Amerkanong buot molayat sa bridge wa kasuhi

CEBU, Philippines - Wala nalang pasakai og kaso ug gitugyan nalang kagahapon sa buhatan sa Bureau of Immigration (BID)-7 ang Amerkanong buot untang maghikog pinaagi sa paglayat sa Marcelo Fernan Bridge sa barangay Umapad, dakbayan sa Mandaue.

Si Inspector Wilson Abot, hepe sa kapolisan sa Presinto 5 sa Mandaue City Police Office (MCPO) nga nahinabi sa Banat News mibutyag nga si Gerry Llynn Johnstone, 50, buot untang maghikog tungod sa problema sa kwarta.

Si Johnstone lumad nga taga Alabama sa nasud sa Estados Unidos ug temporaryong nagpuyo sa sitio Datag sa barangay Maribago, dakbayan sa Lapulapu.

Dugang pa ni Abot nga wala na nila kapasakai og kaso ang maong langyaw sanglit wala man sila makakita og nahimong kadaut sa plano niining pagpakamatay.

Gitataw niya nga nadali lang nila kini sa pagpakalma ug nahangyong mokanaog.

Matud pa niya nga ang BID maoy tukmang ahensiya sa kagamhanan nga makatabang sa maong langyaw sanglit ang gihambin nga suliran nga nakaingon sa tinguha unta niining paghikog mao man ang immigration papers niini nga mi-expire ug wala na siya’y kwartang magamit.

Sa nasayran nga milungtad na og duha ka tuig nga gidugayon sa pagpuyo sa maong langyaw dinhi sa Sugbo ug nagnegosyo og usa ka resto bar sa dakbayan sa Lapulapu apan nasirad-an dihang nabangkaruta. (BANAT NEWS)