CEBU, Philippines - Gikatakdang makigtagbo si Mayor Paz Radaza sa mga barangay kapitan ug kapolisan sa dakbayan sa Lapulapu aron pagtuki sa kahimtang sa kahapsay ug kalinaw sa maong dakbayan ug lakip usab ang pagsusi sa krimen nga naglambigit sa sakop sa “Kuratong Baleleng..”
Matud pa ni Radaza nga sa maong panagtigom magpinirmahay og “covenant” o kasabotang ubanan og panumpa sa tanang hingtungdan nga magbatbat sa ilang mga pasalig ug kaakohan sa pagbantay sa kalinaw ug kahusay sa ilang tagsatagsa ka hurisdiksyon.
Si Mayor Radaza mipasabot nga pinaagi sa maong covenant ang mga kapitan sa barangay dili na makalingkawas sa ilang dakong responsibilidad sa ilang barangay.
Si Association of Barangay Council Fedreration President Leo Mercado nga mao usab ang barangay Kapitan sa Pajo maoy mangulo sa mga opisyal sa barangay sa pagtambong sa maong panagtagbo nga gitakda sa mayor.
Gipasabot ni Radaza nga ang pinatyanay nga nahitabo sa dakbayan maoy usa ka dakong suliran karon nga sulbaronon sa tanang otoridad sa kapolisan sa dakbayan..
Sa laing bahin ang usa ka dakong kaso sa pinusilay sa Lapulapu nga mikalas og tulo ka kinabuhi padayong gitutokan sa kapolisan ang pagsikop sa tanang criminal nga nagpasiugda niini.
Kini human pasaka-i og kaso sa kapolisan si Rick Cadavero ug ang tulo ka mga kauban niini, ug kasong multiple murder ug frustrated murder ang ilang giatubang sa korte.
Si Cadavero maoy suspetsado sa pagmasaker sa giingong kanhi nila kauban sa Kuratong nga nagbase sa dakbayan sa Osamis apan nagpabilin siya karong gawasnon ug padayon pang gipangita sa kapolisan sa maong dakbayan. (BANAT NEWS)