'Egay' wa makabalda sa ika-50 anibersaryo sa Lapu'

CEBU, Philippines -  Bisan pa sa hulga sa kusog nga ulan wala matarog ug nagmalinawon ang selebrasyon sa ika-50 nga anibersaryo sa pagkasiyudad sa dakbayan sa Lapulapu.

Matud pa ni Lapulapu City Councilor Harry “Don” Radaza, ang committee chairman sa Sports and Tourism nga ang selebrasyon niadtong petsa 17 ning bulana maoy kickoff sa usa ka tuig mga selebrasyon sa dakbayan sa Lapulapu nunot sa ika-50 ka tuig nga kasumaran niini pagkahimong dakbayan sukad pa niadtong Hunyo 17, 1961.

Napuno sa mga kalingawan ang kinatibuk-ang dakbayan sa Lapulapu diin ang 19 ka barangay sa mainland ug usa niini sa isla sa Olango mihimo sa dungan nga pagpahigayon og disko, parlor games ug mga torneyo sa chess, volleyball ug pingpong (table tennis).

Sa ilawom sa Marcelo Fernan Bridge gipahigayon usab ang folding bike race, sunset DJ ug ang mabulokong fireworks display nga gibutang sa mga pumpboats sa tunga nga bahin sa Mactan-Mandaue Bridge ug Marcelo Fernan Bridge.

Nasurpresa ang gibanabanang 20 mil ka mga tawo nga misaksi sa impresibong pasundayag sa Pyroworks Fireworks pinangulohan ni Bryan Lim nga milanat og 16-minutos nga world class water base fireworks display.

Atol sa live nga pakigpulong ni Mayor Paz Radaza sa sibyaanang DYRC nagpasalamat kini sa mga Oponganons sa suporta nga ilang gihatag ngadto kaniya sukad pa sa paglingkod ni Cong. Arturo “Boy” Radaza isip kanhi mayor sa dakbayan sa Lapulapu.

Gisaad ni Radaza nga palambuon ang turismo apan mihangyo kini sa mga konstituwente nga batasanon ang pagpanglimpyo ug sundon ang Solid Waste Management aron limpyo ang palibot sa dakbayan sa Lapulapu.

Nahuman ang selebrasyon pinaagi sa paglingaw ni Vice Ganda ug sa live band concert ilawom nga bahin sa Marcelo Fernan Bridge. Miabag sa kapolisan sa pagbantay sa kalinaw ang mga sakop sa Philippine Air Force. (EIM) (BANAT NEWS)