Nagsunog sa kaugalingon

CEBU, Philippines -  Usa ka 24-anyos nga lalaki ang gidudahang naghikog pinaagi sa pagsunog sa iyang kaugalingon lakip na sa ilang ancestral home pasado alas-9 sa miaging gabii sa barangay Poblacion lungsod sa Alcantara.

Ang namatay nailhan nga si Wilfredo Libatan Toquero, 24, molupyo sa maong lugar.

Sa pakighinabi sa Banat News ni PO2 Euberto Alcazarin, team leader sa miresponding mga polis mibutyag padulong na untang mangatulog ang banay sa namatay dihang napugwat sila sa sunog.

Ang babayeng apohan sa namatay maoy gikatahong nakamatikod sa kalayo ug daling nakadagan sa gawas sa maong balay. Sumala pa nga sa sayo pa niana nagkalalis sa amahan si Toquero maong diha kini natulog sa balay sa apohan.

Apan maoy gikatingala sa ginikanan ni Toquero ug sa apohan niini nga wala na kini mogawas hangtud nga naugdaw ug naabo nalang ang panimalay ug walay bisan usa ka haligi nga nahibilin.

Mihulagway usab si Alcazarin nga ang maong karaang balay hinimo sa light materials hinungdan nga naugdaw gyud kini, gibana-banang mokabat og P40 mil ang danyos sa maong sunog.

Si PO2 Ryan Tonelon sa pakighinabi sa Banat News nagkanayon nga ang bombero nga miresponde wala makasulod o makapaduol sa balay tungod kay di maagian og trak ang dalan nga gibana-banang 30 metros gikan sa barangay road.

Si Tonelon nagkanayon nga napalgan ang napaig nga patay’ng lawas ni Toquero ilawom sa atop nga sin sa balay uban sa mga abo kagahapon na sa buntag.

Samtang si Alcazarin nagkanayon nga ang amahan ni Toquero nga si Sergio mitug-an kaniya nga sa sukad pa nianang pagkabuntag nagpunay na og alindasay ang iyang anak (namatay) kay buot maghikog.

Matud pa ni Alcazarin gikan sa gibutyag sa amahan ni Toquero nga sa buntag pa nangita na kini og pisi aron unta magkutlo sa iyang kaugalingon apan ilaha kining napugngan ug gimaymayan apan miresulta hinuon sa panaglalis sa manag-amahan.

Midugang usab si Alcazarin nga wala hinuoy mga silingan nga naangin nga laing panimalay tungod kay layo ang mga kasikbit nga balay.

Gihulagway usab ni Alcazarin nga daw anaa pa sa kalisang ang amahan ni Toquero hinungdan nga dili pa kini nila mapangutana sa mga posibleng hinungdan sa pagsunog sa panimalay ug sa     iyang kaugalingon sa anak niini.(EIM)  (BANAT NEWS)