Mi-gang rape ug killers sa 17-anyos nadakpan

CEBU, Philippines - Nadakpan sa kapolisan ang tulo sa upat ka mga batan-ong lalaki nga maoy gipasanginlang milugos ug mipatay sa amang nga dalagita sa sitio Suba-Masulog, barangay Basak, dakbayan sa Lapulapu alas-10 pasado ang takna sa miaging gabii sa ilang tagsa-tagsa ka panimalay sa maong dapit.

Si SPO1 Manolito Abellanosa miila sa mga nadakpan nga mao sila si Fiel Penoti, 20, Elgie Misa, 22, Reynate Limpangog, 21, pulos mga molupyo sa maong dapit.

Matud pa ni Abellanosa ilaha pang gipangita ang ikaupat nga suspek nga si Julius de Guzman nga gituohang nakasibat na.

Si Abellanosa miingon nga nadakpan ang duha human duha ka mga testigos ang positibong miila kanila. Usa sa mga saksi nga 19-anyos nangangkong nagkuyog silang duha sa biktima nga miguwa sa diskohan ug nangadto sa kalibunan aron unta motubag sa sugo sa lawas.

Apan nakugang nalang kini dihang kalit silang gitionan sa mga suspek og hinagiban nga daw nag-atang nang daan kanila, matud pa nga si de Guzman maoy mipugos sa pagpahayang sa biktima.

Tungod niini daling midagan ang testigo ug midiretso sa ilang balay ug nakugang nalang siya pagkaugma nga wala na makauli ug wala na igkita ang biktima.

Hangtud paglabay sa duha ka adlaw napalgang patay ang biktima ug tungod kay nakonsensya siya sa gidangatan sa higala mipahibalo siya sa mga tanod sa nahitabo.

Matud pa ni Abellanosa nga base sa resulta sa medico legal sa PNP Crime Laboratory gituohang gihapak kini og magahing butang.

Si Abellanosa nagkanayon nga kasong pagpanglugos ug pagpatay ang ilang gipasaka batok sa upat ka mga suspetsado. Dako ang pagtuo sa kapolisan nga dili lang usa ka tawo ang milugos sa biktima.

Usa sa mga suspetsado nga si Misa nga nahinabi sa mga tigbalita hugtanong mihimakak sa maong pasangil ug namahayag nga sayo siyang mipauli sa ilang panimalay ug wala siya’y kalabutan sa maong krimen.

Kagahapon kapin sa napulo ka mga amang ang misulong sa karsel sa mga suspek ug mipadayag sa ilang kalagot ngadto sa mga suspek pinaagi sa pagdala sa ilang mga placards nga nagkondenar sa gihimo sa ilang kauban. - BANAT NEWS