Ipong wa pa kadawat sa desisyon

CEBU, Philippines -    Ang kanhi prinsipal sa Talisay City Central School (TCCS) nga si Maria Lourdes Ipong kinsa gihukman sa Ombudsman-Visayas nga mataktak sa serbisyo nagkanayon nga hangtod kagahapon wala pa siya makadawat og kopya sa nahisgutang desisyon sa Ombudsman batok kaniya.

Si Ipong kinsa nadestino na karon sa Tanke Elementary School isip prinsipal nga nahinabi sa Banat News nagkanayon nga usa lang ka magtutudlo sa TCCS maoy mipahibawo kaniya bahin sa maong desisyon sa Ombudsman .

Gibutyag ni Ipong nga human siya makadawat sa maong report mitawag dayon siya sa iyang sister-in-law kinsa usa ka fiscal ug sa bana niini nga usa ka abogado ug nangayo og mga legal advise.

Ug kung makadawat na siya sa kopya sa desisyon andam na siya sa pagduso sa iyang motion for reconsideration matud ni Ipong.

Iyang gibutyag nga dihang gipatubag siya sa Ombudsman sa nahisgutang reklamo wala siya mokuha og abogado ug siya ra ug ang kanhi Division Superintendent sa Talisay nga si Carmelita Dulangon maoy mitubag niini sa pagtuo nga masulbad ra nila ang maong problema.

Gibutyag usab ni Ipong nga ang maong transaksiyon walay labot ang Department of Education (DepEd) kay iya man kini sa lokal nga kagamhanan sa Talisay. Gitun-an na usab sa iyang mga abogado ang pagduso og kaso batok sa grupo ni Alfie Fernandez.

Si Alfie Fernandez ug mga kauban niini kinsa mga Spiritual Adviser and Officers sa Talisay City Swimming and Life Saving Association Inc. maoy misang-at og kiha nga Malversation of Public Funds ug falsification of official documents batok kang Ipong niadtong 2006.

Ang Ombudsman Visayas mipagawas sa desisyon sa maong kaso niadtong Marso 16, 2011 diin si Regional Director Recaredo Borgonia, sa Department of Education (DepEd)-7 gimanduan sa pagpatuman sa maong desisyon.

Si Fernandez mipasangil nga si Ipong namahayag nga walay pundo ang kagamhanan sa Talisay alang sa ipalit og mga swimsuit sa mga swimmer hinungdan nga ang mga ginikanan sa mga swimmer maoy namalit og swimsuit sa ilang mga anak.

Apan matud ni Fernandez nga dihang ilang gisusi, ilang nasuta nga nakadawat diay si Ipong   og P12,600 alang sa igpapalit og mga swimsuit gikan sa kagamhanan sa siyudad.

Sa iyang counter affidavit giangkon ni Ipong nga siya maoy Physical Education and School Sports Coordinator (PESS) sa Talisay City Division nga makadaghan na siya mogasto og kaugalingon niyang kuwarta kay gitapak sa mga galastohan sa mga panginahanglanon sa mga atleta tungod kay may mga higayon nga dili gastohan sa kagamhanan ang ubang mga panginahanglan sa mga atleta ug mga coach nga ubos sa iyang pagdumala.

Busa dihang nakadawat siya sa tseke nga balor og P12,600 gikan sa City Treasurer’s Office nagtuo siya nga usa kadto ka refund sa mga naabuno niyang kuwarta sa mga panginahanglan sa mga atleta ug mga coach nga iyang gisuperbisahan.

Kay matud pa ni Ipong kanunay siyang makadawat og reimbursement agi og hulip sa personal niyang kwarta nga nagamit atol sa mga nagkalain-laing kompetisyon nga gisalmotan sa mga atleta ug mga coach nga ubos sa iyang pag-atiman.

Si Ipong mipasabot nga wala siyay intensiyon nga mogama og krimen ug andam siyang motabang nga makorihian ang mga sayop kung aduna man ugaling sa pagproseso sa mga dokumento sa nahisgutang kwarta nga iyang nadawat. (WC)(BANAT NEWS)