Nalumos atol sa anibersaryo sa kasal

CEBU, Philippines - Misangpot sa pagbangutan ang unta malipayong selebrasyon sa wedding anniversary sa usa ka magtiayon human ang bana nalumos sa dagat atol sa ilang pagpangaligo diha sa Quarry Beach Resort sa sitio Quarry sa Looc siyudad sa Danao niadtong Domingo sa alas 5:20 sa hapon.

 Ang napalgang patay na nga naglutaw sa dagat mao si Roel Cañete Pepito, 27, molupyo sa barangay Sabang sa nahisgutang siyudad.

Matud pa ni SPO2 Ildefonso Prosia sa Danao City Police Station dihang nahinabi sa Banat News si Pepito kauban ang iyang asawa ug mga anak ug tibuok sakop sa pamilya ug mga higala nangaligo og dagat aron iselebrar ang ilang kaminyuon.

Apan samtang nagkalingaw sila og pangaligo sa dagat ug nagluto sa ilang pagkaon dungan ang pag-inom wala mabantayi si Pepito nga nag-inusarang miubog sa lawom nga bahin sa dagat.

Nakugang nalang ang mga kabanay niini dihang wala na mopatin-aw ug ilahang gipangita sulod sa upat ka oras hangtud nadiskubrehan kini nga patay na ug naglutaw sa dagat.

Sa pakisusi sa City health personnel gituohan nga pagkalumos ang gikamatyan ni Pepito ug gisalikway niini ang posibleng foul play.  (BANAT NEWS)