CEBU, Philippines - Gideklarar sa Malacañang nga walay trabaho ug walay klase sa dakbayan sa Lapulapu karong Hunyo 17, 2011 atol sa ika-50 anibersaryo sa kaugalingnan diin gitawag kini nga “Lapulapu 50 Na.”
Base sa kamandoan gikan sa Malacañang pinaagi ni Executive Secretary Paquito Ochoa angayan nga hatagan og importansiya ang pagsaulog sa dakbayan sa Lapulapu sa iyang kaugalingnan diin sa milabay’ng Hunyo 17, 1961 nahimong dakbayan ang Lapulapu isip usa ka Component City sa lalawigan sa Sugbu.
Gumikan sa hangyo sa mga opisyales sa dakbayan sa Lapulapu pinangulohan ni Lapulapu City Mayor Paz Radaza ang Malacañang mitugot sa pagdeklarar nga holiday karong June 17, 2011 sa maong siyudad.
Samtang si Lapulapu City Councilor Hon. Harry “Don” Radaza ang Chairman sa Committee on Sport and Tourism mipadayag nga andam na ang tanan alang sa maong kasaulogan diin sa umaabot petsa 17 ning bulana maoy “kick off” sa usa ka tuig nga pagsaulog sa kaugalingnan sa dakbayan sa Lapulapu. (BANAT NEWS)