Rama motambong sa tigom sa Israel

CEBU, Philippines - Gikatakdang molarga si Mayor Michael Rama padulong sa nasud sa Israel alang sa 27th Annual Mayor’s Conference nga matapos karong Hunyo 16. 

Mahitabo ang maong panagtigom sa nagkadaiyang mayor sa kalibutan aron mag-ambitay sila sa ilang mga ideya sa ilang mga pamaagi pagpalapad sa ilang serbisyo ngadto sa ilang mga konstituwente.

Hisgutan usab nila ang pamaagi sa pagkab-ot sa digital education ingon man usab ang pagpalambo sa alternatibong enerhiya.

Bisitahon usab sa mayor ang usa sa inila nga tambalanan sa maong nasud, ang Rambam Medical Center aron ilang masuta kung giunsa pagresponde sa maong tambalanan ang ilang mga pasyente panahon sa emerhensya.

Ang mayor sa siyudad sa Jerusalem nga si Nir Barkat maoy usa sa modumala sa nahisgutang kalihukan.

Nagkanayon si Rama nga ini og balik niya dinhi sa Sugbo iyang ipaambit sa publiko ang iyang mga nakat-onan ug ang uban niini mahimong mapatuman sa nagkadaiyang programa sa gobiyerno. (BANATNEWS)