Magtutudlo gireklamo namaligya'g notebook

CEBU, Philippines - Ang mga ginikanan sa mga estudyante sa Maghaway Elementary School sa dakbayan sa Talisay mipasangil sa mga magtutudlo sa nahisgutang tunghaan nga namaligya kuno kini og kinilo sa mga workbook ug quiz notebook ngadto sa publiko.

Sa nakita sa mga tigbalita , kasagaran sa maong mga notebook pipila lang ka mga panid ang nasuwatan nga puwede pang magamit sa mga estudyante.

Si Larie Gencono, 36, ug Charlito Caballero kinsa pulos may mga anak nga nagtungha sa maong eskuwelahan miadto sa buhatan ni Talisay City Division Superintendent Woodrow Denuyo ug mipadangat sa ilang reklamo.

Ang duha mipakita usab sa lista sa 20 ka mga ginikanan kinsa mipirma nga nakapalit sila sa maong mga notebook.

Si Gencono nagkanayon nga si Christine Genica usa sa mga inahang basurera ang mipalit sa mga notebook sa tag P.50 matag kilo ug may lima ka sako sa maong mga notebook ang iyang napalit.

Unya gibaligya na usab kuno kini ni Genica og tag P3 ang buok sa adunay suwat ug tag P5 ang walay suwat.

Si Gencono ug Caballero nagkanayon nga kun giuli pa kining mga notboka ngadto sa mga estudyante hayan nga magamit pa kini nila pinaagi sa ilang mga ginikanan nga maoy momaneho niini aron lang makadaginot sa galastuhon sa ilang anak.

Si Patricia Gella, Education Program Supervisor sa Department of Education sa dakbayan sa Talisay mibutyag sa mga tigbalita nga gisusi niya ang maong isyu ug matud niya nga ang prinsipal sa maong tunghaan nga si Meluz Noval mibutyag nga naghabwa sila sa mga basura sulod sa mga classroom aron malimpiyo ug malu-ag ang lugar.

Lakip sa mga basura mao ang mga papel nga wala na gamita ug ang nahisgutang mga notebook.

Matud ni Gella nga dihang napagawas na sa mga magtutudlo ang mga basura, si Genica nakakita niini ug giingong mihangyo nga dili lang ipalabay kay siya lay mokuha niini.

Si Gella midugang nga wala ibaligya sa mga magtutudlo ang maong mga notebook apan gihatag lang kini ngadto kang Genica.

Si Denuyo sa iyang bahin, nagkanayon nga ipasusi niya kung unsa ka tinuod ang pasangil sa mga parents nga gibaligya og kinilo sa mga maestra ang maong notebook ngadto kang Genica.

Ang maong hitabo naghatag og giya sa DepEd sa Talisay nga pagmando sa tanang tulunghaan nga inig-tak-op sa klase ang mga notebook ipanguli ngadto sa mga bata   aron makita usab sa mga ginikanan ang performance sa ilang mga anak tungod kay kasagaran sa mga notebook mga quiz notebook man. (BANAT NEWS)