CEBU, Philippines - Si Kongresista Eduardo Gullas sa unang distrito sa probinsiya sa Sugbo mipasalamat sa sinagop ni Mayor Socrates Fernandez nga si Joavan Fernandez sa pagpakita niini og pagbag-o.
Sa gipahigayong press conference kagahapon sa buntag diha sa buhatan ni Gullas sa University Of the Visayas nagkanayon kini nga kinahanglan lang gyud nga saktong tawo ang makatambag kang Joavan aron moseryuso sa pag-usab.
“I thank him for his good intentions, but Joavan needs an expert’s advice. He has to get it from someone who has expertise,” matud pang Gullas nga nagtumbok o mipasabot kang Cebu City Police Office Director Ramon Melvin Buenafe. Si Gullas nagkanayon usab nga nag-ampo siya nga mapadayon ni Joavan ang iyang tinguha apan nagkinahanglan ang sinagop sa mayor mapa-rehabilitate sanglit si Buenafe dili eksperto alang niini.
“Wa man gud siya’y training pag-rehab sa usa ka tawo nga na-involve sa drugs. But I’m praying, sa iyang gipakita (Joavan), maayo unta nga magpadayon,” ni Gullas pa.
Kahinumduman nga dihang si Joavan nalambigit sa sunod-sunod nga kontrobersiya, si Gullas miawhag sa mayor nga ipasulod na kini sa rehabilitation center. Ning bag-ohay lang si Joavan mipahigayon og feeding program alang sa kabataan sa kabarangayan sa Talisay ug gawas niini si Joavan mitabang usab kini sa housing project sa iyang amahan.
Si Joavan mipasalig usab nga mohatag og suporta sa kapolisan sa mga proyekto niini usa na mao ang pagbutang og police outpost diha sa South Coastal Road. - (BANAT NEWS)