CEBU, Philippines - Gibati og dili tiaw nga kahinangop ang 12 ka pamilya sa sitio Malibu sa barangay Subangdaku, dakbayan sa Mandaue nga nahatagan na og katumanan ang ilang pangindahay nga makabaton og kaugalingon ug permamenteng panimalay.
Sa seremonyas nga gipahigayon sa miaging Domingo gipadayag ni Julie Magdadaro ngadto sa kagamhanan sa dakbayan sa Mandaue nga gipangulohan ni Mayor Jonas Cortes og pasalamat sa paghatag og katumanan niini.
Matud pa ni Magdadaro nga kapin na sa 20 ka tuig nga gidugayon ang ilang paningkamot nga makabaton og kaugalingong kapuy-an ug niining panahona hingpit na nga nahatagan og katumanan.
Si Magdadaro miingon nga daghan kaayong mga kakulian nga ilang nasinati ilabi na nga ang maong luna nga ilang gipuy-an sakop sa 9. 2 ka ektaryang luna nga gidonar ni kanhi Mayor Alfredo Ouano ngadto sa kahugpongan sa urban poor sa maong lugar.
Si Cortes miingon nga base sa plano, 315 ka mga housing unit sa maong luna ang tukoron nga panag-iyahon sa mga kabus nga benepisyaryo.
Dugang pa ni Cortes nga gitinguha usab sa iyang administrasyon nga kahatagan og permamente ug desenteng kapuy-an ang mga informal settlers sa dakbayan maong mipalit ang dakbayan sa 6.5 ka ektaryang luna sa barangay Paknaan sa maong dakbayan.
Gitataw ni Cortes nga ang maong luna nga ipaubos sa Community Mortgage Program (CMP) sa kagamhanan mapahimuslan sa mokabat 2,000 ka mga kabus sa dakbayan nga kasamtangan karong nagpuyo sa danger zone area nga sama sa sapa ug daplin sa kabaybayonan. - (BANAT NEWS)