Duha ka sakop sa BIN padayong gipangita

CEBU, Philippines - Sakop sa Barangay Intelligence Network (BIN) sa Fuente Police Station ang duha sa lima ka suspetsado sa pagdagit ug pag-salvage sa manag-agaw’ng Parawan niadtong Huwebes Santo sa miaging buwan.

Si Allan Sanchez nga BIN kinsa padayon pang gipangita sa kapulisan maoy gipasanginlan nga impormante sa ilang grupo aron dagiton si Glenn Parawan ug iyang 17-anyos nga ig-agaw’ng.

Si Chief Insp. Romeo Santander, hepe sa City Intelligence Branch (CIB) nagkanayon sa mga tigbalita nga padayon ilang pagpangita ni Sanchez uban sa laing duha niini nga mga kauban nga nailhan lang sa pangalan nga Jay-R nga maoy drayber sa gisakyan pagdagit sa duha ka biktima ug ang ginganlan og Aladin.

Si Gualberto Librando, 60, nga usa sab ka BIN maoy himuong star witness karun sa kaso sa manag-agaw’ng Parawan, siya nadakpan sa kapulisan niadtong Martes sa hapon diha sa ilang pinuy-anan sa barangay Mambaling tungod sa paghupot og .38 revolver nga walay lisensya.

Si Librando nalakip sa lima ka suspetsado sa maong krimen apan giklaro ni Santander nga wala kini partisipasyon sa pagpatay sa mga biktima. 

Atol sa gihimong re-enactment sa kapulisan niadtong Miyerkules sa hapon si Librando misaysay sa iyang nasaksihan sa sinugdanan gikan sa wala pa gi-pick-up ang duha ka biktima diha sa uptown area hangtud nga ilang gidala sa poultry farm sa barangay Malubog nga gipanag-iya sa usa ka druglord ug didto na gibunal-bunalan og kahoy, ‘pala’, gidunggab og icepick, ‘buwang sa manok ug pagkamatay gisulod og sako sa feeds sa manok ug ilang gilabay ngadto sa barangay Taptap diin gibaatan og packaging tape ang mga baba sa duha.

Si Librando mitug-an nga si Orlando Mejares alyas ‘Bogart’ manauray og buwang kinsa nadakpan sa buybust operation sa mga sakop sa CIB maoy usa sa mipatay sa duha apan gihimakak kini ni Mejares.

Samtang sa pikas bahin ilisan na og Barangay Peacekeeping Action Team (BPAT) ang Barangay Intelligence Network (BIN) matud pa ni Sr. Supt. Melvin Ramon Buenafe, hepe sa Cebu City Police Office (CCPO).

Estriktuhon na usab ang background checking sa mga aplikante sa BPAT ug kini base usab sa direktiba sa Department of Interior and Local Government (DILG) ug sa Camp Crame. (BANAT NEWS)