CEBU, Philippines - Usa ka 27-anyos nga lalaki nga bag-ong minyo ang gisikop sa kapolisan human gyud sa iyang kasal niadtong Lunes sa buntag sulod sa simbahan sa San Nicolas de Tolentino sa lungsod sa Malabuyoc tungod sa 3-counts nga kasong rape.
Ang suspetsado mao si Leonel Manabat alyas “Waray” taga barangay Vito, lungsod sa Balamban.
Si Manabat nasikop nila ni SPO3 Ariel Mascardo, SPO1 Mario Paler, PO3 Leopoldo Tagalog, PO2 Bella Donna Ybañez, PO1 Ronidilo Duerme ug PO1 Christian Mantillano pinasikad sa warrant of arrest sa “3-counts of rape in relation to RA 7610” nga giluwatan ni Regional Trial Court (RTC) Judge Hermes Montero sa Branch 59 sa dakbayan sa Toledo.
Si Ybañez kinsa maoy Women and Children Protection Desk Officer sa Malabuyoc Police Station mibutyag nga kanhi sa Balamban Police Station siya nadestino ug niadtong Marso 8, 2011 lang siya nabalhin sa Malabuyoc.
Matud niya nga siya maoy nakahupot sa kaso ni Manabat didto sa Balamban kinsa ang biktima sa suspetsado usa ka menor de edad ug silingan niini.
Ang biktima diha na misumbong sa kapolisan human sa ikatulong hitabo nga pagpanglugos usa ka semana na usab ang nakalabay ug nakasibat na si Manabat.
Ang maong policewoman wala na hinuon makahinumdom kung unsang tuiga nahitabo ang pagpanglugos apan atol sa gihimong mass wedding diha sa San Nicolas de Tolentino Parish sa Malabuyoc iyang nasiplatan si Manabat nga usa sa gikasal.
Hinungdan nga dali siyang nanawag ngadto sa Balamban Police Station ug nagpa-fax sa kopya sa warrant of arrest sa suspetsado.
Ang mga polis mihuwat nga mahuman ang seremonya sa kasal una nila gisikop si Manabat.
Si Ybañez midugang nga ang suspetsado wala na mosukol ngadto kanila hinuon misulti kini nga nakahibawo siyang duna siya’y kaso ug aduna gyud siya’y warrant sa maong kaso.
Ang suspetsado gidala sa mga police ngadto sa Balamban Police Station ug gibalhog sa karsel samtang ang asawa niini nahibilin sa simbahan igo na lang sa paghilak. (Ug Ria Mae Y.Booc sa The Freeman/EIM) (BANAT NEWS)