Magpale magpabiling tsirman sa Turismo

CEBU, Philippines -  Magpabiling chairman sa Committee on Tourism si Bise-Gobernador Agnes Magpale, kini ang nasabutan human sa panagtagbo nila ni Gobernador Gwendolyn Garcia didto sa Kapitolyo sa miaging adlaw.

Matud pa ni Magpale nga bisan kun daghan siya og mga gimbuhaton, apan madala ra niya ang maong mga gimbuhaton.

Bisan pa sa hulga nga mawad-an siya og puwesto kun ugaling modaug ang kanhi kandidato pagka-bise gobernador Glenn Soco sa iyang electoral protest nga gisang-at sa Commission on Elections (COMELEC) batok sa mitaliwang si anhing Bise- Gobernador Greg Sanchez, si Magpale sa gihapon mipasalig nga anha siya moserbisyo sa turismo sa Sugbo pinaagi sa Tourism Committee sa Cebu Chamber of Commerce and Industry (CCCI) nga usa ka private sector

Iyang gitataw nga suod kaayo sa iyang kasing-kasing ang Committee on Tourism ug ang Committee on Family, Women and Children, ug busa wala siya mabalaka nga mawad-an na siya og puwesto sa umaabot nga adlaw diha sa Kapitolyo.

Sa maong kahimtang mag-uban na sila si board member Thadeo Ouano kinsa maoy vice chairman sa Committee on Tourism sa hunta probinsyal. (BANAT NEWS)