CEBU, Philippines - Gipadayag ni Mayor Michael Rama nga kinahanglan nga dili isakripisyo ang kalidad sa usa ka inprastraktura gumikan sa presyo sa usa ka proyekto.
Kini maoy tubag ni Rama human madawat ang report kalabot sa giingong mga proyekto nga barato ang presyo apan menus ang kalidad.
Nagkanayon ang mayor nga dili angayang huna-hunaon ang presyo sa ipatuman nga proyekto kundi ang kalidad o kalig-on ug katahom maoy mahinungdanon. Kasamtangang gipadaplin una ni Konsehal Roberto Cabarrubias, ang tsirman sa committee on infrastructure sa konseho sa siyudad sa Sugbo ang kasamtangang proyekto sa MSDLR Construction dinhi sa siyudad.
Nasayran nga bag-ohay lang nakadaug ang MSDLR sa bidding alang pagpaayo sa usa ka merkado dinhi sa siyudad.
Kahinumdoman nga maong kompaniya maoy kontraktor sa gikuwestyon nga depektosong building sa Toong Integrated School diin ang pipila ka bahin niini nangliki.
Sumala pa sa konsehal nga kinahanglan nga sulbaron una sa MSDLR ang problema sa school building sa Toong aron makapadayon kini sa pagtrabaho sa uban pang mga proyekto sa siyudad. Dugang pa niya nga ipaagi gyud niya og hustong proseso ang pagpatuman sa sa mga proyektong inprastraktura sa siyudad aron dili kini mag-atubang og problema puhon. - BANAT NEWS