Hapon di na mokiha sa gipasanginlang polis

CEBU, Philippines - Buhian sa kapolisan sa dakbayan sa Lapulapu ang usa ka polis nga sakop sa Mandaue City Police Office (dili sakop sa Lapulapu City Police Office nga unang migawas dinhi) nga giakusahang nanulis sa usa ka Hapon sa dakbayan sa Lapulapu sa milabay’ng Sabado.

Base sa nakuhang impormasyon sa Banat News sa buhatan sa Crime Against Property kanhi (TRS) sa Lapulapu City Police Office adunay gikatakdang oras nga ang reklamante sa usa ka detenado kinahanglan makapasaka og kaso sulod sa 48-oras.

Ug kung molapas kini posibleng buhian sa kapolisan ang usa ka detenado aron dili sila maoy mapasakaan og kaso sa akusado. Si Insp. William Humoc nagkanayon nga miadto si Masami Kon sa ilang buhatan ug mipahibalong dili na kini interesadong mopasaka og kaso tungod sa kahasol.

Gikuha usab ni Kon ang iyang lisensya ug ang plaka sa iyang sakyanan nga giingong gilangkat ni PO2 Bruce Taneo nga una niyang gipasanginlang mitulis ug mikulata kaniya human siya makadasmag diha sa dakbayan sa Lapulapu niadtong Sabado.

Si Humoc sa iyang bahin sa report sa TV Patrol Central Visayas nagkanayon nga bisan ilang buhian si Taneo wala kini magpasabot nga dili na gyud mamahimong mopasaka og kaso si Kon. Si Taneo gikatakdang mag-atubang usab og kasong administratiba kabahin sa maong kaso.

Samtang subling gipanghimakak sa maong polis ang alegasyon ni Kon nga iya kining gitulis sa dihang nagsibilyan kini nga miresponde sa usa ka traffic accident nga gikalambigitan sa maong langyaw diha sa dakbayan sa Lapulapu.

Giangkon niini nga iyang gikuha ang lisensiya sa maong Hapon aron itugyan sa kapolisan, apan gumikan kay aduna pa siyay gihapit naunhan siya sa pagpa-blotter ni Kon.

Si Kon mipasangil nga usa ka lalaking nagsibilyang polis ang mikuha sa iyang pitaka, apan ang maong polis kinsa residente usab sa dakbayan sa Lapulapu dangtan og pipila ka minutos miabot sa mao gihapong buhatan aron unta i-turnover ang lisensya ni Kon.   - BANAT NEWS