Merkado sa Tabunok tak-opan sa Mayo 28

CEBU, Philippines -  Ang kagamhanan sa dakbayan sa Talisay andam nang mopatuman sa balaod nga pagpabalhin sa mga manindahay sa merkado sa Tabunok ngadto sa bag-ong merkado sa barangay Lagtang kay tak-opan na ang merkado sa Tabunok.

Si Konsehal Rodolfo Cabigas, sa committee on physical structure of new market utilities and circumferential road sa pakighinabi sa Banat News kagahapon nagkanayon nga gisusi na nila ang numero sa mga stall, water system ug ang kalimpyo sa bag-ong merkado.

Gawas niini ilang gipaningkamutan nga miinstalar na ang mga poste sa suga sa daplin sa sapa aron mohayag na ang lugar.

Giklaro ni Cabigas nga sa Mayo 28, 2011 sugdan na ang pag-raffle sa mga stall aron patas ug walay magmahay sa mga vendor kun asang lamesaha o puwestoha ang ilang maangkon, kay sa maong adlaw sirad-an na ang merkado sa Tabunok.

Ang mga vendor nga walay stall sa daang merkado sa Tabunok, paningkamutan sa siyudad nga makabaton sila og mga pwesto sa bag-ong merkado sa Lagtang.

Kahinumdoman nga ang manindahay sa merkado sa Tabunok walay gustong mobalhin ngadto sa bag-ong merkado sa Lagtang ug gani nag- rally didto sa city hall sa pagpakita sa ilang pagsupak. (BANAT NEWS)