CEBU, Philippines - Nalandig sa tambalanan ang usa ka 25-anyos nga lalaki human kini unaya sa pagtigbas sa iyang uyoan taliwa sa ilang lalis kagahapon sa buntag diha sa sitio Upper Greenbelt sa barangay Quiot siyudad sa Sugbu.
Si Jayme Trazona, 25, nakaangko’g samad tinigbasan sa wala ug tuo nga bukton ug tuhod pagsinagang sa pagtigbas kaniya sa iyang uyoang si Antonio Trazona, 41.
Sa imbestigasyon sa kapulisan nagbutyag nga nagkalalis ang biktima ug ang suspek mahitungod sa karaang ipil-ipil nga giputol sa suspetsado nga miresulta sa ilang komprontase nga misangpot sa pagpanigbas.
Ang biktima gidali pagdala sa Cebu City Medical Center samtang ang suspek nasikop sa kapulisan.
Matud ni PO3 Wetzel Berry sa Homicide Section nga ang maong kahoy mitubo sa yuta duol sa balay sa biktima maong nasuko kining gihilabtan sa suspek, ang suspek sa iyang bahin nangangkong igo ra siyang nanalipod sa iyang kaugalingon maong natigbasan niini ang pag-umangkon. (BANATNEWS)