Balay ni Bella Santos gilungkab

CEBU, Philippines -  Dul-an sa usa ka gatus ka libo ka pesos nga balor sa mga mahalong butang ang nahanaw human gilungkab ang pinuy-anan ni Bella Ruby Santos ang suspek sa kasong pagdagit ug pagpatay sa 6-anyos nga si Ellah Joy Pique sa sitio Bayong barangay Inayagan siyudad sa Naga niadtong Miyerkules sa alas 10:30 sa gabii.

Ang biktima nga si Bella Ruby Santos, 35, nga nabutang karun sa kontrobersya sa maong kaso midangop sa kapolisan sa dakbayan sa Naga ug misumbong nga gilungkab ang iyang panimalay sa wala mailhing mga tawo.

Matud ni PO1 Junarie Latorre, desk officer sa Naga City Police Station dihang nahinabi sa Banat News nahanaw ang laptop nga mokantidad og P60 mil; digital camera nga Olympus nga mokantidad og P17 mil ug i-pad nga wala mabutang ang kantidad.

Subay sa imbestigasyon, mikatkat sa konkretong koral sa panimalay sa biktima ang mga kawatan gamit ang ligid sa trak nga gipatong- patong.

Dihang didto na sulod sa compound gitangtang niini ang screen sa bintana ug pagkahuman giguba ang sliding window sa kwarto ug didto moagi paingon sa sulod.

Tungod kay walay nahabiling tawo nakahigayun pagkuha sa nahisgutang mahalong mga butang ug yanong misibat.

Alas-10 na sa gabii sa pag-uli ni Santos niya madiskubrehi ang pagpangawat hinungdan nga misumbong nalang kini sa kapolisan.

Sa report sa TV Patrol Central Visayas si Santos misalikway dayon sa pagdudang ‘gimik’ lang ang pagpanglungkab nga gihimo sa iyang balay.

Nahibulong kini kun nganong sa kadaghan sa iyang mga appliances kadtong iya rang mga electronic gadgets ang gikuha.

Kahinumduman nga pipila sa mga electronic gadgets ni Santos nga nasakmit sa kapolisan ug girepresentar nga ebidensya sa pagpapatay kang Pique ang gimando sa korte nga ipauli kaniya.

Si Sr. Supt. Patrocinio Comendador, director sa Cebu Provincial Police Office ug pangulo sa Task Force Pique mipasalig nga ilang imbestigahon ang reklamo ni Santos.

Apan kini mipasumbingay nga kinahanglang mapamatud-an ni Santos nga nakawatan gyud kini. Siya midugang nga kung dunay kawatan nga ilang masubay ilaha gyud kining dakpon ug lutoson.

Nanghinaot lang siya nga dili gamiton ang kapolisan, media ug ubang ahensya sa gobiyerno aron lang magamit sa nag-ungot nga kaso.

Samtang kagahapon, midangop sa Fuente Police Station ang amahan ni Ellah Joy nga si Renante ug mipa-blotter sa giingong ‘kill-sign’ nga gimustra kaniya ni Santos atol sa hearing sa korte.

Matud pa ni Renante nga gamit ang tudlo ni Santos misenyas kini sa iya sama sa paggulgol sa liog nga sama sa giihaw hinungdan sa iyang kahadlok dugang pa niini ang lima ka tawo nga giingong nagpunay og balik-balik sa ilang barangay nga nagpangutana og mga impormasyon kabahin sa iyaha.  (BANAT NEWS)