CEBU, Philippines - Opisyal nang gipahibawo sa pamilyang Sanchez ang lubong ni anhing bise gobernador Gregorio “Greg” Sanchez Jr., himoon karong Sabado, Mayo 7, 2011 didto sa Mactan Island Memorial Garden sa Marigondon, siyudad sa Lapulapu.
Gipahibawo kini sa tigpamaba sa pamilyang Sanchez nga si Busay barangay captain Eliodoro “Yody” Sanchez, pag-umangkon sa namatay.
Matud ni kapitan Sanchez nga ang santos nga misa karung Sabado himoon sa ala 1:00 sa hapon sa Redemptorist Church sa barangay Camputhaw ning dakbayan sa Sugbo ug dayon ihatod kini sa katapusang pahulayan didto sa Mactan Island Memorial Garden.
Ang haya karon sa bise gobernador nahimutang sa Crystal Palace sa Cosmopolitan Funel Homes sa Nevil Hills sa barangay Lahug ug gipahibawo ang mga suod nga higala ug dumadapig sa bise gobernador nga gustong mobisita sa haya niini nga adunay sakyanang nagpundo matag karun ug unya sa Cosmopolitan aron maoy mohakot paingon ngadto sa Crystal Palace.
Una nang gi-schedule ang lubong sa bise gobernador sa adlaw untang Domingo apan naatol kini sa away ni Manny Pacquiao ug Shane Mosley, busa aron kahatagan og higayon nga makahatod gyud ang tanang mga supporter ug suod nga higala sa bise gobernador, gisibog kini sa adlaw’ng Sabado. - BANAT NEWS