CEBU, Philippines - Usa ang patay ug usa ang seryosong naangol human ang ilang gisakyang motorsiklo nabangga sa poste sa kuryente niadtong Domingo sa kaadlawon alas-3 pasado diha sa barangay Kabitoonan sa dakbayan sa Toledo.
Ang namatay giila sa kapulisan nga mao si Virgiel Tomarong Ipis, 18, molupyo sa nahisgutang lugar samtang ang naangol mao si Riz Cruz Ipis, 24, taga barangay Carmen siyudad sa Toledo.
Segun sa pasiunang imbestigasyon sa kapulisan gikan sa disko ang duha ug sa ilang pagpamauli ang mga biktima sakay sa motorsiklo nga Honda Wave nga gimaneho ni Riz.
Apan pag-abot sa nahisgutang lugar kalit lang mitipas sa tuong bahin sa karsada ang motorsiklo ug mibangga sa poste sa street lighting.
Tungod sa kakusog sa pagbangga nangalagpot sa sementadong karsada ang duha ug nahiagom og grabeng bun-og sa kalawasan lakip na ang ilang ulo kinsa gidali paghatud sa Toledo District Hospital apan si Tomarong gideklarar nga dead on arrival (DOA). - BANAT NEWS