Prayer vigil ipahiayon dinhi atol sa Beatification ni Pope John Paul II

CEBU, Philippines - Andam na ang Archdiocese sa Sugbu sa pagduyog ug pagsaulog sa makasaysayanong “beatification” ni anhing Pope John Paul II karong adlawa didto sa Vatican City sa Roma.

Ang tanang simbahan dinhi sa Sugbu giatangang mopahigayon og Santos nga Misa alang sa pag-ampo sa namatay nga Santo Papa nga maoy katapusang lakang paingon ngadto sa pagbayaw niya isip usa ka santos.

Mahinungdanon alang sa mga Sugbuanon sa pagduyog sa tibuok Katolikong Simbahan sa tibuok kalibutan ang pag-beatify kang Pope John Paul II kinsa nahimong suod sa mga katolikong Sugbuanon.

Niadtong tuig 1981, duha ka adlaw nga miistar dinhi sa Sugbu ang anhing Santo Papa nga gidugokan sa iyang gipahigayong Santos nga Misa didto sa karaang Lahug Airport.

Samtang adunay ipahigayong espesyal nga “prayer vigil” sa Archbishop’s Palace pahinungod sa anhing Santo Papa.

“Ang prayer vigil adto himuon tapad sa statue ni Pope John Paul II, open ni sa tanan nga gustong moapil ilabi na kadtong mga deboto sa kanhi Santo Papa,” matud pa ni Msgr. Achilles Dakay, media liaison sa Archdiocese of Cebu.

Gawas sa mga katolikong deboto, mangulo usab sa maong prayer vigil si Cebu Archbishop Jose Palma.

Bugtong si Palma ang motambong sa maong prayer vigil tungod kay si Cebu Archbishop Emeritus Cardinal Vidal atoa sa Roma isip representante sa nasud sa beatification rites.

Sa laing bahin, dungan sa beatification ni Pope John Paul II mao ang pagpahigayon sa “Mass for Workers” karong alas-2 sa hapon diha sa Sto. Rosario Parish Church sa barangay San Antonio ning dakbayan. (BANATNEWS)