Pahayag ni Enriquez gihimakak ni Rama

CEBU, Philippines -  Gipanghimakak ni Mayor Michael Rama ang migawas nga taho nga matud pa nga nawad-an na siya og pagsalig kang Bantay Dagat Commission (CCBDC) Project Director Cesar Enriquez hinungdan nga iya kining gipahulipan kang Retired Colonel Ranulfo Sebusa.

Gitataw sa mayor nga ganahan lang siya nga adunay kausaban sa sistema sa pagpadagan sa maong departamento.

Dugang pa ni Rama nga saludo siya sa abilidad ni Enriquez busa bukas gihapon siya sa posibilidad nga ikadestino kini sa laing departamento.

“ Salig gyud ko sa katakos ni Enriquez , ug puwede ta nga hatagan siya og ubang mga gimbuhaton,” nagkanayon ang mayor.

Si Enriquez kagahapon mibutyag nga wala siya’y mahimo kung dili mo-resign na lang gyud sa iyang posisyon gumikan sa nadunggan niya nga tabi-tabi nga nawad-an na kuno og pagsalig kaniya ang mayor.

Nasayran nga si security consultant Romeo Cordova sa City Hall maoy nag-review sa performance ni Enriquez.

Gipadayag ni Cordova nga ipaubos gihapon og imbestigasyon si Enriquez bisan wala na kini sa CCBDC.

Partikular nga imbestigahon mao ang bahin sa alegasyon nga matud pa adunay mga kahiwian sa pagduma ni Enriquez sa iyang departamentong gidumala.

Si Enriquez nagsugod sa iyang serbisyo sa CCBDC niadtong 2006 isip hulip ni anhing Elpidio “Jojo” dela Victoria.

Giklaro ni Rama nga dili kini angayan nga himoong isyu sanglit natural lang nga adunay kausaban sa estraktura sa mga nagdumala sa nagkadaiyang departamento sa City Hall sa higayon nga iyang malantawan nga adunay angayang palamboong buhatan. (BANAT NEWS)