CEBU, Philippines - Gipalawman sa mga sakop sa Investigation Detection and Management Bureau (IDMB) sa Mandaue City Police Office (MCPO) aron mailhan ang mga tawong misakiyo sa dakong kantidad nga salapi sa JW Auto LPG Corporation nga human kawati gisuwayan pa unta pagsunog.
Si Inspector Ramil Morpos, hepe sa IDMB kinsa maoy nangulo sa imbestigasyon mipatawag na sa mga kawani sa maong establisamento aron makakuha og dugang impormasyon.
Matud pa ni Morpos nga mokabat sa P300,000 nga salapi ang nasakiyo sa wala hiilhing kawatan nga misulod sa maong establisamento pinaagi sa paglungkab sa bintana ug pagkahuman miduslit pa og kalayo hinungdan sa pagkasunog niini. Ang mga kawani nga naglakip sa gwardiya sa maong establisamento nga si Reynaldo Reyes Jr., Jofel Pansacala, 26, nga taga Tagunol, Pardo sa dakbayan sa Sugbo maoy nagtinabangay sa pagpawong sa kalayo gamit ang tubig gikan sa ilang puso.
Ang pagpangawat ug pagpanulis migara na og maayo sa dakbayan sa Mandaue ug sa Consolacion ning nanglabay’ng mga adlaw.
Niadtong milabay’ng Lunes sa hapon gitulis ug gipatay sa duha ka armadong mga lalaki ang Phoenix Gasoline Station sa lungsod sa Consolacion.
Samtang dili palang usab dugay, duha ka mga delivery sales agents sa usa ka kompanya sa softdrinks ang nabiktima gihapon sa pagpanulis sa managlahing dapit sa dakbayan sa Mandaue. - BANAT NEWS