Kalangay sa sweldo sa BEOs gibasol ngadto sa mga kapitan

CEBU, Philippines - Gibutyag sa administrative officer sa City Environmental Sanitation Enforcement Team (Ceset) nga si Eric Surban nga usa sa nakapalangay sa suweldo sa mga sakop sa honorarium sa mga Barangay Environmental Officers mao ang pagsige og ilis sa mga barangay kapitan sa ilang mga BEOs.

Matud pa nga ihan-ay gyud nila og tarong ang ilang master list sa dili pa mahatagan og honorariums ang mga BEOs busa gihangyo niya ang kooperasyon sa mga kapitan sa barangay.

Gitambagan niya ang mga kapitan nga dili magsige og ilis sa ilang mga BEO aron dili malangan ang pag-release sa ilang mga honorarium.

Giklaro hinuon niya nga duna gyu’y gigahin ang siyudad alang sa mga BEO ug kasamtangan na kini karon nga giproseso sa City Treasurer’s Office. Dugang pa niya nga dili angay maguol ang BEOs gumikan kay gipaningkamotan sa ilang buhatan nga mapaspas ang pag-release sa ilang mga honorarium.

Samtang moduso sila og hangyo alang sa dugang P8 milyones sa sunod nga supplemental budget aron maapod-apod kini sa tanang kapin sa 200 ka mga BEO sa siyudad.

Matud pa nga ang kasamtangang budget nila nga P3 milyones karong tuiga dili paigo gumikan kay dunay ubang mga barangay ang nagdugang og BEOs.

Ang nahisgutang budget kutob karong buwana busa importante kaayo kanila ang dugang P8 milyones aron magpadayon ang operasyon sa BEO. Dunay mga dagkong barangay ang nanginahanglan og dugang BEO aron mapalapad ang paggukod sa mga badlungong tawo nga magpataka og labay sa ilang mga basura.

Ang BEOs mao usab ang nagsiguro ug nagtudlo sa publiko sa saktong pagbahig sa mga basura gikan sa malata ug sa dili malata nunot sa higpit nga pagpatuman sa polisiya sa dakbayan nga no segregation-no collection policy.  - BANAT NEWS