CEBU, Philippines - Gibutyag kagahapon ni Mayor Michael Rama nga mga 75% na sa mga residente sa siyudad sa Sugbo ang misunod na sa pag-segregate kon pagbahig sa mga basura.
Gitataw sa mayor nga duna na’y ubang mga tawo ang nakaamgo kung unsa kahugaw sa palibot kung dili i-segregate ang basura.
Dugang pa sa mayor nga mangunay siya pagsuroy ngadto sa nagkadaiyang mga barangay aron susihon ang kahimtang sa ilang palibot ug sa susamang higayon sutaon niya kung misaler ba ang kampanya sa opisyales sa barangay sa pagpatuman sa “No Segregation, No Collection Policy”. “Human sa tulo ka buwan, akong panghinaut nga motuman na unta ang tanan sa atong balaod,” matud pa ni Rama.
Samtang gisuroy na usab ni Rama ang Consolacion sa milabay nga adlaw aron susihon kung haom ba ang mga basura sa siyudad nga ilabay sa maong dapit. Nagkanayon ang mayor nga ipaubos niya og hugot nga ebalwasyon ang maong dapit nga labayanan sa basura sa dakbayan sa Sugbo.
Giduaw usab niya ang Siyudad sa Naga kagahapon ug iyang giinspeksyon ang usa ka pribadong Material Recovery Facilities sa maong dapit.
Gitataw hinoon sa mayor nga dili pa siya makahatag og desisyon kung molabay ba ang siyudad sa Sugbo og mga basura sa Consolacion ug Naga sanglit iya paman kini nga ipaubos sa diskusyon sa mga kaubanan niya nga opisyales sa siyudad. - BANAT NEWS