Rama motabang sa napusilan

CEBU, Philippines - Gipasalig ni Mayor Michael Rama nga mohatag og pinansyal nga ayuda ngadto sa pamilya ni Arsenio Hanggin Jr. kinsa napusilan sa mga tulisan niadtong milabay’ng semana.

Usa si Hanggin sa nasamdan uban sa laing tawo nga si Felix Panugaling kinsa pabilin pa karon sa tambalanan. Ang duha maoy miresponde human nila mabantayi nga dunay gitulis sa Mambaling Flyover.

Ang gitulis mao si Lovely Hubahid, 17, taga barangay Punta Prinsesa ug ang tulisan nga ginganlan og Jeffrey Pulgo, 30, taga sitio Tinabangay sa barangay Mambaling.

Ang suspetsado naputos sa mga bun-og sa lawas dihang gitabangan kini og kulata sa mga estambay sa maong lugar.

Pag-umangkon ni Hanggin si Hubahid busa mitabang siya sa paggukod sa isnatser apan wala kini masayod nga armado diay ang maong tulisan.

Si Kapitan Jose Navarro sa Barangay Punta Prinsesa mipadayag nga bayanihon kaayo ang gibuhat nila ni Hanggin ug Panugaling kay miatubang kini sa risgo sa dihang miresponde sila sa insidente.

Si Mayor Rama mihangop usab sa duha gumikan sa kaisog niini ug mitunol usab siya sa iyang pahasubo ngadto sa mga kabanay sa biktima.

Dugang pa sa mayor nga talagsaon kaayo ang kaisog nga gipakita nila ni Hanggin ug Panugaling.

Gitahasan na ni Rama ang Police Coordinating Advisory Council (PCAC) nga mosusi sa maong insidente aron mahimoan na og rekomendasyon ang angay nga itunol ngadto sa mga pamilya sa maong mga biktima. ( WC)   - BANAT NEWS