Pasaherong namukong mipatay sa drayber

CEBU, Philippines - Namatay ang usa ka PUJ drayber human kini gipusil sa iyang pasaherong namukong niadtong Domingo sa alas-4 pasado sa hapon diha sa may Fuente Osmeña sa barangay Sta. Cruz siyudad sa Sugbu.

Ang biktima giila sa kapulisan nga mao si Bob Fermin Rosel Jr., 21, kasamtangang nagpuyo sa sitio Opra sa barangay Kalunasan apan lumad nga taga Calatrava, Negros Occidental. Ang biktima nagmaneho sa PUJ nagtangag sa plaka GVF-119 nga nagbiyahian og Opra-Carbon uban sa iyang konduktor nga si Renren Bahente.

Si Bahente mitug-an ni PO3 Wetzel Berry ug mga kaubanan sa Homicide Section nga samtang naghunong sa maong dapit nanawag siya og pasahero ug dihang may misakay nga babaye iyang gisultihan ang gikatahapan sa pagsibog dungan sa pagpatapsing og estoryang ‘part paagia una ning babaye kay mo plete ra ba ni.’

Tungod niini nasuko ang maong lalaki ug mibunot sa dalang wala matinong kalibre sa armas ug gitionan si Bahente. Ang biktima pagkakita niadtong higayona nanaog sa iyang PUJ ug nagbitbit og wrench apan kalit siyang gipusil makausa ka higayon sa maong tawo diha sa walang bahin sa dughan.

Dali unta kining gidala sa mirespondeng mga polis diha sa Vicente Sotto Memorial Medical Center (VSMMC) apan paglabay sa pipila ka minutos namatay kini.

Samtang ang wala mailhing kriminal nga nagsul-ob lang og kolor puti nga t-shirt ug dunay tribal tattoo sa tuong bukton daling misibat palayo sa lugar kuyog ang laing duha ka mga batan-ong lalaki.

Ang kapulisan nanawagan karun sa mga pasahero sa biktima nga mopatim-aw sa ilang buhatan aron mohatag og deskripsyon sa maong lalaki aron ila kining mailhan. - BANAT NEWS