Huwes nakawata'g mga butang sa balay

CEBU, Philippines - Mikapin sa P40 mil ang kantidad sa mga butang nga nasakiyo sa wala hiilhing kawatan gikan sa balay sa usa ka Huwes niadtong Biyernes Santo sa alas 2:30 sa hapon sa barangay San Isidro, dakbayan sa Talisay. Ang biktima mao si Regional Trial Court (RTC) Judge Olegario Sarmiento sa Branch 24 ug residente usab sa nahisgutang barangay.

Nadala sa kawatan gikan sa balay ni Sarmiento ang usa ka unit nga Acer laptop nga nagkantidad og P30,000, usa ka Nokia cellphone, P5,000 ug usa ka Samsung karaoke player, P6,000. Base sa imbestigasyon sa kapolisan nga ang kawatan didto moagi sa likod nga pultahan sa balay ni Sarmiento ug nakahigayon pagkiriw sa maong mga butang tungod kay walay tawo ang balay sa biktima sukad niadtong Huwebes Santo .

Si PO1 Jundave David kinsa maoy mipahigayon sa follow-up investigation nagkanayon nga girovingan nila kanunay ang maong lugar ug karon ila pang gihimoan og follow-up ang nahitabo.

Sa laing bahin, ang Talisay City Police Station temporaryong mi-hang up sa ilang linya sa telepono nga 273-3636 naproblema sila sa maong linya tungod sa mga prank callers diin manawag sa police station nga magbugal-bugal lang ug ang uban dili motingog kung tubagon na ang tawag. Ang linya nga 278872 maoy gigamit una karon sa mga polis sa pagdawat og mga tawag.   (BANAT NEWS)