Gilapsan sa bala angol

CEBU, Philippines - Nabuslot ang tiyan ug buko-buko sa usa ka tawo nga gipusil sa iyang silingan sa barangay Tungan , Isla sa Olango, dakbayan sa Lapulapu sa miaging gabii.

Ang biktima mao si Diosdado Ladorio Juesen, 50, minyo, ug ang suspetsado mao si Ruel Ompad, 25, disco operator sa nahisgotang dapit.

Si PO2 John Carlo Jucotan sa kapolisan sa maong lungsod miingon nga daan na nga nagkaaway ang biktima ug suspetsado.

Dugang pa niya nga nahiagi ang suspetsado sa balay sa inahan sa biktima ug dihang nakita niya ang biktima mikanaog kini sa iyang motorsiklong gisakyan dayong pusil sa naulahi.

Apan mikagar ug wala makabuto ang iyang armas busa gisuwayan kini og ilog sa biktima ug nagka linayogay sila

Apan mibuto ang armas ug pagkahuman nahagba sa yuta ang biktima kansang bala milapos sa iyang buko-buko gikan sa tiyan.

Ang biktima dali nga gidala ngadto sa Olango Island District Hospital apan gibalhin kini ngadto sa Mactan Doctor’s Hospital sa dakbayan sa Lapulapu.

Samtang ang kapolisan sa maong dapit padayon nga nagpangita karon sa suspetsado kinsa nakasibat dayon human sa hitabo. (WC)   - BANAT NEWS