CEBU, Philippines - Usa ka 43-anyos nga babayeng mobisita unta sa iyang kapuyong bilanggo sa Mandaue City Jail ang gibalhog og lahos sa maong bilanggoan human masakping mipalusot unta og pinaketeng gituohang shabu sa maong prisuhan.
Ang pagkasikop kang Ester Alilin, 43, natigayon atol sa pagrekisa kaniya diha sa receiving area sa maong bilanggoan nga gipahigayon sa mga babayeng jailguards nga sila si JO1 Shiela dela Victoria ug JO2 Anna Rose Berdin.
Matud pa nga human marekisa ang tanan lakip na ang ‘tinagoang’ bahin sa lawas walay nakitang ‘shabu’ gikan niini apan sa dayon na unta kining padayunon og sulod gipanganga siya sa mga jailguards ug diha makit-ing aduna diay kini giugom nga plastik.
Si Insp. Anaclito Lusaran, deputy jail warden sa Mandaue City Jail nga nahinabi sa Banat News nagkanayon nga aduna na sila kaniadto pang nadawat nga report kabahin sa pagpayuhot og ilegal nga drugas diha sa sulod.
Giingong mga paryente ra usab sa mga bilanggo ang tigpalusot niini. Ug ning higayona ang dalaw sa binilanggong si Mercelito Hertisano maoy nasakpan.
Si Alilin, nga taga dalan Batiller sa barangay Umapad sa maong dakbayan nakuhaan og onse ka mga gagmay’ng paketeng gituohang ang sulod shabu nga gipasok ilawom sa dila niini.
Matud pang Lusaran nga tungod sa pagdawat nila og impormasyong kabahin sa pagpalusot og shabu sa mag dalaw gimando ni Chief Inspector Jessie Olis Calumpang nga maoy ilang jail warden nga higpitan pa ang pagrekisa sa babayeng bisita.
Gitug-an ni Lusaran nga si Alilin kanunay na nga magbisitahan sa kapuyo nga si Hertisano kinsa nag-atubang gihapon og kasong may kalambigitan sa illegal nga drugas.
Si Alilin gikatakdang pasakaan og kasong kalapasan sa Republic Act 9165 kon Comprehensive Dangerous Drug Act of 2002. - BANAT NEWS