CEBU, Philippines - Giawhag ni Bise Mayor Joy Augustus Young ang publiko nga mohatag og partisipasyon sa mga kalihukan sa Semana Santa.
Gilusad sa kagamhanan sa siyudad sa Sugbo ang Semana Santa 2011 isip kabahin sa pagpahinumdom sa katawhan sa mga kaagi ni Hesus .
Nasayran nga ang Cebu City Tourism Council (CCTC) mipakatap og 10,000 ka mga kopya sa leaflets nga nagsilbing gabayan sa mga turista kinsa buot masayod sa mga schedule sa nagkdaiyang kalihukan panahon sa Semana Santa ug kini sama sa Siete Palabras, Via Cruces ug uban pa.
Gisukipan usab kini og guide map aron masuta sa katawhan ang lokasyon sa mga simbahan sa siyudad sa Sugbo nga ilang bisitahon panahon sa Bisita Iglesia pagka-Huwebes Santo.
Sa laing bahin, ang kagamhanan sa siyudad sa Sugbo pinaagi sa Cebu City Traffic Operations Management (CITOM) andam na sa pag-monitor sa dagan sa trapiko karong semanaha.
Ang CITOM motabang pagbantay sa dagan sa trapiko sa nagkadaiyang terminal, pantalan ug sa mga lugar nga kasagarang dagsaan sa mga sakyanan.
Motambayayong ang Citom sa paghan-ay sa trapiko ngadto sa nagkadaiyang ahensiya sama sa Cebu Port Authority, Land Transportation Franchising and Regulatory Board, PNP Traffic Group ug Land Transportation Office. (BANAT NEWS)