Batang gibugaw sa magtiayon naluwas

CEBU, Philippines - Naluwas ang usa ka 16-anyos nga menor de edad nga babaye gikan sa magtiayong gipasanginlang pugsanong ‘mibugaw’ kaniya atol sa entrapment operation sa kapulisan sa mga sakop sa City Intelligence Branch (CIB) sa Cebu City Police Office (CCPO) sa miaging alas 8:45 sa gabii diha sa sudlonon nga bahin sa barangay Kamagayan siyudad sa Sugbu.

Ang maong operasyon inabagan sa International Justice Mission (IJM) ug Department of Social Welfare and Development (DSWD).

Si Liza dili tinuod ang pangan lumad nga taga Leyte anaa karun gikustodiya sa DSWD Central Visayas.

Samtang ang magtiayong nadakpan sa entrapment mao si Ricardo ‘Alyas’ Cardo’ Ramos, 53, ug asawa niining si Myrna, 48, nagpuyo sa nahisgutang lugar samtang gipangita pa ang laing usa nga giingong apil sa mibugaw sa biktima.

Si Chief Insp. Romeo Santander, hepe sa CIB nga nahinabi sa mga tigbalita nagkanayon ang ilang operasyon inabagan sa IJM ug DSWD tipik ug kabahin kini sa ilang kampanya sa Human Trafficking dinhi sa dakbayan sa Sugbu.

Matud ni Santander nga ang IJM maoy nakadawat og impormasyon kabahin sa maong dalagita nga nag-antos tungod sa pagbugaw kaniya ngadto sa mga gutom sa unod maong aduna na kini karoy sakit.

Nagkanayon si Santander subay sa gihimo   nilang pakisusi nasuta nga ang magtiayong Ramos dunay videokihan ug imnanan ug kun ganahan mangabang og babaye naa dayoy ikahatag ang magtiayong Ramos.

Matud ni Santander mipadala sila og decoy niadtong higayona ug nangita kunohay og batan-ong babaye nga nagpangidaron og 16-anyos ug sa dihang nagkasinabot sa presyo ang ilang decoy gitunol dayon ang P2 mil nga may ultra violet powder ngadto kang Ricardo ug gihatag dayon ang bata aron pasakyon unta sa ilang sakyanan.

Gihulagway ni Santander nga ang 16-anyos nga dalagita nga ‘in-demand’ kaayo sa kalalakin-an sanglit matag gabii dili mominos napulo ngadto sa 16 ka mga lalaki ang mogamit kaniya.

Apan bisan sa kadaghan sa mga costumer sa dalagita matag gabii P500 ray ihatag kaniya sa magtiayong Ramos sumala pang Santander.

Ang magtiayong Ramos mireklamo nganong sila gyud ang gi-target sa kapulisan apan si Santander miinsister nga sila maoy labing dako diha sa Kamagayan nga nagnegosyo og mga babaye nga mugbo og lupad. Gani matud pang Santander nga ilaha na kining gironda sa nangaging buwan hinungdan nga giusab nila ang ilang ‘style’ sa pagpamugaw ug ipaagi nalang sa text o tawag sa ilang mga costumer.

Apan giklaro niini nga aduna pay laing target diha sa maong barangay nga ilang rondahon sa mosunod nga mga adlaw.

“The PNP are conducting seriously in Human Trafficking, we are protecting the rights of the woman specially minors,” matud pang Santander. Atol sa operasyon nakakuha usab ang kapulisan og duha ka box sa condom.

Giandam na sa kapulisan ang kaso nga kalapasan sa R.A 9208 (Anti Human Trafficking) nga walay gitugot nga piyansa batok sa mga dinakpan samtang gidungog ang husay sa maong kaso. Si Ricardo sa pakighinabi sa Banat News miangkong usa siya ka ex-convict apan mihimakak nga nagnegosyo siya og mga babaye ug padayong miinsister nga imnanan ug computer nga ‘piso-piso’ ra ang iyang panginabuhian.

Iya usab gihimakak nga dunay entrapment nga nahitabo sanglit wala siya makadawat og kwarta gikan sa kapulisan. Nagtuo hinuon si Ricardo nga gisuyaan siya sa iyang mga silingan tungod kay kusog kaayo ang iyang vediokihan panahon sa gabii hinungdan nga siya gipasanginlan nga bugaw. (EIM) (BANATNEWS)