TF Pique posibleng mokiha sa kapitan sa Inayagan, Naga

CEBU, Philippines -  Gitun-an karon sa Task Force Ella Joy Pique ang posibilidad nga pagpasaka og kaso batok sa barangay kapitan sa Inayagan syudad sa Naga nga si kapitan Narciso Tablate tungod sa gipakita niining pagka-‘antagonista’ ngadto sa mga polis atol sa ilang pag-implementar sa search warrant sa panimalay ni Bella Ruby Santos.

Si Sr. Supt. Patrocinio Comendador ang tigpamaba sa task force ug hepe sa kapolisan sa lalawigan sa Sugbo mibutyag nga ang ngalan ni Tablate nahisgutan atol sa gihimong case conference sa task force.

Matud pa ni Comendador nga si Tablate giingong nasuko sa raiding team tungod kay wala makig-coordinate kaniya ang mga polis sa ilang operasyon.

“Nangutana pa jud na siya ug si Ruby ba ang subject sa pag-conduct sa search. Mura ba og naka benefit ni siya from her,” matud pa ni Comendador.

Midugang si Comendador nga mopahigayon sila og halawom nga imbestigasyon kun si Tablate mi-tolerate ba sa cyber sex operation sa iyang barangay nga giingong midaghan na sa iyang barangay.

“ Wa man ko nasuko niya ang iya lang nganong na brought up sa task force nga antagonistic siya sa operation sa police,” pasabot pa ni Comendador.

Samtang giklaro usab ni Comendador nga tampered gyud ang plaka sa sakyanan ni Santos ug aduna silay saksi niini.

Butyag usab ni Comendador nga mopresentar usab sila og mga hulagway atol sa gihimo nga operasyon, buot sa task force nga ipabilin isip ebidensya ang maong sakyanan nga una nang gimando sa korte nga ipauli.

Sa laing bahin ang kampo ni Santos, ang gitumbok nga suspetsado sa pagsignit ug posibleng pagpatay ni Pique miduso sa korte og ex-parte motion for the issuance of subpoena ngadto sa kapitan sa barangay Inayagan syudad sa Naga ug sa photographer sa usa ka pamantalaan nga si Arni Aclao nga mikuha og hulagway sa sakyanan.

Ang counsel ni Santos nga si Atty. Ramesses Victorious Villagonzalo, miduso sa maong mosyon sa sala ni Executive Judge Meindrado Paredes kini aron makapamatuod silang Tablate ug Aclao aron maklaro na ang kontrobersya kabahin sa tampering sa plaka gikan sa LMJ-382 ngadto na sa LHJ-382. (BANAT NEWS)