CEBU, Philippines - Gilitok kanunay ni Mayor Michael Rama “No Segregation, No Collection Policy” sa tanang higayong makigtagbo siya sa taga barangay ug sa uban pang okasyon nga aduna siyay “speaking engagement” pagpasabot nga hugot ang iyang pagpanguna ning maong kampanya.
Sa nagkadaiyang seremonya sa graduation sukad pa sa miaging bulan, kanunay nga gipahimangno sa mayor nga importante kaayo ang pag-segregate kon pagbahig sa basura ilabi na karong gisirad-an na ang pipila ka bahin sa Inayawan landfill.
Sumala sa mayor nga malikayan usab ang mga pagbaha kung hiposon pagtarong ang mga basura.
Sa pagkakaron, ang pipila ka mga opisyal sa dakbayan sa Sugbo mihimo og nagkadaiyang pulong-pulong sa mga barangay alang sa maong kampanya.
Nasayran nga mokabat na sa kapin 200 ka mga indibidwal ug pito ka mga barangay ang naluwatan na og citation ticket gumikan sa kapakyas nila sa pagtuman sa balaod bahin sa tukmang paghipos sa basura.
Matud pa sa mayor nga sa wala pa ipatuman ang No Segregation , No Collection Policy, mikabat sa tag 500 tonelada ang mga basura matag adlaw nga itapok ngadto sa basurahan sa Inayawan.
Apan karong giestrekto na ang pagpatuman sa maong kampanya nahimo nalang 180 tonelada ang ilabay nga basura ngadto sa maong labayanan.
Samtang si Konsehal Nida Cabrera mipadayag nga dako kaayo og natabang ang pipila ka materials recovery facility (MRF) sa nagkadaiyang barangay kalabot ning pag-atiman sa basura.
Subling gipahimangnoan ni Cabrera ang publiko nga ang mga malata nga basura kolektahon matag adlaw nga Lunes, Miyerkules, Biyernes ug Domingo, samtang ang dili malata kolektahon sa mga adlaw nga Martes, Huwebes ug Sabado. - (BANAT NEWS)