CEBU, Philippines - Gibutyag ni Konsehal Nida Cabrera nga may kompanya nga mihatag og proposal nga mohimo og landfill sa usa ka pribadong luna sa Barangay Agsungot.
Apan matud pa ni Cabrera nga dili kini basta-basta ma-aprobahan tungod kay mag-agi pa kini og bug-at nga konsultasyon ilabi na ang pagsusi sa dapit kung dili ba kini makadaot sa kalikopan.
Ang maong luna may gidak-ong lima ka ektarya ug gibana-bana nga mogasto ang gobyerno og P500 milyones sa pag-ugmad niini pinaagi sa pagkuha sa serbisyo sa nahisgutang pagpatigayon.
“Murag mahal ra sab kaayo ug ang area angay pa gyung susihon, kay aduna basin may mangreklamo” nagkanayon si Cabrera.
Matud pa ni Cabrera nga mas maayo gyung tumanon sa katawhan ang pagbahig sa basura.
Gihangop usab sa konsehal nga ang mga empleyado sa barangay nga maoy nangunay sa pag-segregate sa mga basura nga nagpasad sa kadalanan apan giklaro niya nga edukahon gyud ang ilang konstituwente aron dili kini magsalig sa barangay.
Dugang pa ni Cabrera nga sugdan na nila pag-apod apod matag barangay ang mga citation ticket alang sa mga tawong dili mo-segregate sa ilang mga basura. Magsugod na usab karon ang mga pulong-pulong sa nagkadaiyang barangay ilabi na sa mga lugar nga wala pa hingpit masayod sa “No Segregation,No Collection Policy”.
Gani gitigom na usab kagahapon sa Cebu City Hall ang mga presidente sa mga kapilya aron hugot gyud nga makaabot ngadto sa komunidad ang maong impormasyon. - (BANAT NEWS)