CEBU, Philippines - Gihatagan og napulo ka adlaw sa uluhang buhatan sa Ombudsman ang mga opisyales sa Kapitolyo ug ubang pribadong indibidwal sa pagpatubag sa reklamo labot sa kontrobersiyal nga pagkapalit sa luna sa mga Balili sa dakbayan sa Naga.
Ang kamandoan gipirmahan ni Director Mary Antonette Yalao sa Preliminary Investigation and Administrative Adjudication Bureau (PARB) niadto pang Marso 16, 2011 apan kagahapon lang nadawat sa mga hingtungdan.
Nasayran nga ang buhatan sa Ombudsman-Visayas nimando sa pag-imbestigar sa reklamong kriminal batok nilang Gob. Gwendolyn Garcia, Bise-Gob. Gregorio Sanchez, Jr. ug mga sakop sa Hunta Probinsiyal labot sa pagpalit sa maong luna.
Ang mga sakop sa Hunta Probinsiyal ug mga kanhing sakop nga nalambigit sa reklamo nagtagbo kagahapon ug ilang gikauyunan nga mohangyo og dugang 15 ka adlaw sa pagduso sa ilang tubag.
Si Atty. Rory Jon Sepulveda, tigpamaba ni Garcia, miingon nga ilang tubagon ang reklamo samtang susama usab ang pamahayag ni Atty. Oliveros Kintanar, abogado ni Sanchez kinsa anaa pa karon sa tambalanan.
Usa sa mga gireklamo, kanhi Bokal Jose Ma. Gastardo, miingon nga kini ang panahon nga makatubag sila sa reklamo ug mga pamasangil.
Sayo niini si Sepulveda miingon nga sa higayun nga maduso na ni Garcia ang tubag, wala na’y kasong kriminal nga mapasaka batok sa gobernador.
Ang reklamo nagagumikan sa pagbayad sa Kapitolyo niadtong tuig 2008 sa luna nga giingong ang dakung bahin anaa ilawom sa dagat.
Ubang sakop sa Hunta Probinsiyal mao sila si Bokal Agnes Magpale, Victor Maambong, Peter John Calderon, Juan Bolo, Julian Daan, Wilfredo Caminero, Jose Ma. Gastardo, Rose Marie Durano, Joven Mondigo Jr., Wenceslao Gakit, Alfred Francis Ouano, Teresita Celis ug Bea Mercede Calderon.
Lakip sa patubagon sa reklamo ang mga sakop sa appraisals committee nga gilangkuban sa pipila ka department heads ug mga kawani sa Kapitolyo. (BANATNEWS)