3-man panel sa piskalya maoy motan-aw sa kaso ni Pique

CEBU, Philippines -  Si acting Provincial Prosecutor Joseph Berciles migama og panel nga moimbestigar sa reklamong gipasaka sa Criminal Investigation and Detection Group (CIDG) batok kang Bella Ruby Santos ug Ian Charles Griffith tungod sa pagdagit ug pagpatay sa 6-anyos nga si Ellah Joy Pique.

Niadtong Abril 4, 2011 sa hapon si Berciles mipagawas sa iyang memorandum nga naghatag og direktiba ngadto kang Prosecutor Jose Edwin Renegado, Prosecutor Annabelle Robles ug Maria Luisa Ong nga mopahigayon og imbestigasyon sa kasong kidnapping with homicide nga gipasaka batok kang Santos ug Griffith.

Ang panel mitudlo kang Renegado isip pangulo sa panel. Si Berciles mipasabot nga aron walay mahitabong bias sa imbestigasyon hinungdan nga mitukod siya sa investigating panel.

Matud usab niya nga ang investigating panel moisyu og subpoena sa mga respondents nga sila si Santos ug Griffith nga moduso sa ilang counter-affidavit sa reklamong gipasaka batok kanila.

Ini og kahuman niini ang panel hatagan og 60 ka adlaw aron mopahigayon og preliminary investigation diin susihon kun may probable cause ang kaso aron mapasaka kini ngadto sa korte.

Ang maong panel makapadayon sa ilang pagsusi sa kaso bisan adunay pending nga motion to quash search warrant nga giduso ang kampo ni Santos tungod kay lahi kini nga isyu.

Si Santos ug Griffith hugtanong mihimakak sa pasangil batok kanila ug misumbalik og pagpasaka og kasong perjury batok sa kapolisan ug sa mga testigos tungod sa pagtumo-tumo.

Samtang si Sr. Supt. Patrocinio Comendador, ang hepe sa Cebu Provincial Police Office ug tigpamaba sa Task Force Ellah Joy Pique mipasalig kang Renante Pique, amahan sa biktima, nga walay angayang ikabalaka kabahin sa ‘private investigators’ nga gituohan niyang gisuholan sa kampo sa depensa.

“Murag dunay planong impluwensyahan ang task force aron mabali ang result sa investigation in favor sa depensa. Well dili dapat mabalaka kay it will not affect the case,” pasalig pang Comendador.

Gihulagway ni Comendador nga estratehiya ra kini sa depensa aron tuison ang imbestigasyon.

Samtang sa report sa TV Patrol Central Visayas kagahapon, gihimakak sa depensa ang pasangil nga gihasi nila ang mga testigos. - Brenda D. Batuto, Rey Pasaporte ug Mylen P. Manto sa The Freeman/EIM ( BANAT NEWS )