Mipatay sa polis sa ilawom taytayan gikiha

CEBU, Philippines - Giduso na niadtong Huwebes sa hapon diha sa Talisay City prosecutors office ang kasong murder batok sa tulo ka giingong mga tulisan nga suspetsado sa pagpusil patay kang PO1 William Mangubat Jr. niadtong Marso 11 ning tuiga.

Si Senior Inspector Errol Francis Deveyra ang officer-in-charge (OIC) sa Talisay City Police Station nga nahinabi sa Banat News kagahapon mibutyag nga gilibkas na nila ang pagpahigayon sa hot pursuit operation batok sa magsuong Lito ug Jundy Oros ug sa kauban nilang si Noel Simbajon alyas Noel Pacaña.

Matud ni Deveyra nga huwaton na lang nila ang warrant of arrest gikan sa korte batok sa tulo aron ilaha kining masikop.

Gibutyag usab ni Deveyra nga duna silay mga witness sa nahitabong insidente kinsa miluwat sa ilang mga affidavit.

Kahinumduman nga niadtong Marso 11, 2011 sa hapon si Mangubat uban sa iyang buddy nga si PO1 Vhenjie Pantuan nagpahigayon og foot patrol diha sa sitio Mananga 2, barangay Tabunok, dakbayan sa Talisay.

Si Mangubat daling migukod sa tulisan kinsa mikanaog gikan sa jeep nga pasaheroan human kini makatulis sa usa ka pasahero.

Ang nahisgutang tulisan giingong nagbitbit og pusil ug sa bag sa biktima ug kalma kaayong naglakaw paingon sa ilawom sa tulay sa Mananga.

Ang nahisgutang polis nga biktima giingong gitabangan kini sa mga suspetsado ug usa kanila ang mipusil ngadto kang Mangubat pag-abot diha sa ilawom sa tulay.

Human sa maong hitabo si Deveyra mibutang og mga polis nga mopahigayon og foot patrol diha sa ilawom sa Mananga matag-adlaw.

Samtang ang konseho sa dakbayan sa Talisay miduso og resolusyon nga nag-awhag kang Mayor Socrates Fernandez nga mopagawas og pundo nga P100 mil alang sa ganti sa makatudlo sa nahimutang sa mga suspetsado. - BANAT NEWS