Lalaki diriyot mapaig human daubi sa kapuyo ang ilang payag

CEBU, Philippines - Maayong pagkaugdaw sa usa ka panimalay ug diriyot masugbang buhi ang usa ka lalaki human giingong gidauban sa kapuyo niini ang ilang gipuy-ang payag human sila maglalis alas-5 na sa kaadlawon sa miaging adlaw diha sa barangay Maglantang lungsod sa Tabogon.

Ang midaob sa balay mao si Dionela Suncados, 55, samtang ang kapuyo nga iyang gikabangi mao si Marcelo Guliman.

Sa pakighinabi sa Banat News ni PO3 Jesus Suan, misaysay kini nga nianang pagkagabii si Guliman nagyawyaw human dugay kaayong nakauli sa panimalay ang iyang kapuyo nga si Suncados.

Sa diha nga nahinanok na og katulog si Guliman mao nalang ang iyang namatikdan ang ka-init nga iyang gibati sa lawas ug ang yawyaw ni Suncados nga iyang nadunggan gikan sa gawas.

Nakurat nalang siya nga nagdilaab na ang ilang balay nga ginama sa gilala nga lukay sa lubi ug kawayan hinungdan nga mibalikwas kini og midagan paggawas ug nangayo og tabang sa mga silingan.

Ang kapuyo ni Guliman nga si Suncados iya usab dayun nga gipasikop tungod sa gibuhat niini apan kagahapong adlawa, matud pa ni PO3 Suan nga nianang mag-atubang na unta si Guliman ug Suncados sa piskalya kalit lang nga mihangyo si Guliman ngadto ni Suan nga dili na niya ipadayon ang kiha.

Hinungdan nga nabuhi-an ra usab dayun si Suncados ug nagkauyonay ang duruha nga magbuwag nalang og puyo. - BANAT NEWS