CEBU, Philippines - Namatay ang usa ka batan-on human mabangga ang iyang gisakyang motorsiklo sa usa ka nag-parking nga bus pasaheroan didto sa barangay Sangi syudad sa Toledo sa miaging kaadlawon.
Ang biktima nailhan nga si Ramil Ignalig, 21, nga taga sitio Juan Climaco, barangay Magdugo sa nahisgutang dakbayan.
Sa pakighinabi sa Banat News ni SPO4 Gil Lastimosa, misaysay kini nga ang biktima nagpaingon sa ilang balay sakay sa iyang Honda Wave nga motorsiklo nga walay plaka.
Apan sa pag-abot niya sa nahisgutang lugar midasmag kini sa Mark Canoneo Bus nga nag-parking daplin sa karsada samtang ang drayber ug ang konduktor nangatulog sa sulod sa maong sakyanan.
Gumikan sa kakusog nga pagkabangga, nalagpot ang biktima gikan sa iyang motor ug maayong pagkapantok ang ulo sa sementadong karsada.
Ang biktima gidali paghatod ngadto sa Toledo District Hospital diin didto kini ideklarar nga dead on arrival.
Matud pa ni Lastimosa nga daghang mga posibilidad nganong nabangga ang biktima, mahimong naka-inom kini samtang nagmaneho, o kaha nakatulog samtang nagpadagan sa iyang sakyanan. (WC) (BANATNEWS)