CEBU, Philippines - Naluwas ang usa ka inahan ug upat niya ka mga anak bisan nahinanok pagkatulog sulod sa usa ka bodega sa mga stock sa baligyang bombilya nga nasunog kagahapon sa kaadlawon diha sa Modesta St., sa barangay Guadalupe ning siyudad.
Mikabat sa tunga sa milyon ka pesos ang gibana-banang danyos sa bodega bisan wala kini ma-ugdaw. Ang CTS Lightings nga nasunog gipanag-iya sa usa ka Kindy Chan.
Nadawat ang alarma sa kabomberohan alas 3:17 ug nakontrolar sulod lamang sa walo ka minutos.
Si FO2 Emiliano Daño imbestigador sa Cebu City Fire Department nagkanayon nga nagsugod ang sunog diha sa tuong entrance sa maong bodega.
Swerte nga wala maunsa si Mildred Estrada kinsa usa ka stay-in nga trabahante uban sa upat niya ka mga anak nga natulog sulod sa maong bodega human makagawas atol sa pag-ulbo sa sunog.
Gituohan nga electrical related ang posibleng hinungdan sa sunog apan si Daño padayon pang mihimo sa ilang imbestigasyon pagsuta sa hinungdan sa maong sunog. (BANAT NEWS)