Malnourished namenusan apan dul-an 5mil tabangon

CEBU, Philippines - Mius-os ang gidaghanon sa mga batang malnourish dinhi sa dakbayan sa Sugbu sumala pa sa Cebu City Health Department gikan sa tuig 2009 hangtud karong tuiga sukad nga gilusad ang kampanya batok sa malnutrition sa nagkadaiyang barangay.

Apan bisan paman niini aduna pa gihapoy 4,955 ka mga bata sa siyudad nga nagpangidaron og singko anyos paubos ang nakaplagan nga malnourished sa milabay nga tuig. Matud pa ni City Health Department's nutrition program coordinator nga si Emma Gaviola nga maong gidaghanon mas ubos kumparar sa 7,290 nga kaso sa malnourished niadtong 2009.

Natumbok na usab ang nag-unang napulo ka barangay nga daghan og batang malnourished ug kini mao ang Ermita, Mambaling, Duljo-Fatima, Sapangdaku, Buot-Taup, Inayawan, Agsungot, Pamutan, Pahina-San Nicolas ug Punta Princesa.

Nakig-alayon usab karon ang kagamhanan sa mga non-government organizations alang sa paghimo og sunod-sunod nga feeding program ug miawhag sa mga pribadong kompanya sa pagsagop og barangay nga ilang tabangan. Padayon gihapon ang feeding programs sa mga day care center sa kabarangayan. (BANATNEWS)