City Council sa M'daue moawhag kang Luigi nga ma-lone district ang dakbayan

CEBU, Philippines - Mopalabang og resolusyon ang konseho sa dakbayan sa Mandaue nga mag-awhag kang 6th District Representative Gabriel Luis Quisumbing sa pagpalabang na og balaudnon alang sa pag-lone congressional district sa dakbayan.

Si Bise Mayor Glenn Bercede dihang nahinabi sa Banat News miingon nga ang mao nilang resolusyon gipaluyohan sa gihimo sad nga resolusyon sa mga barangay kapitan nga nag-awhag kang Quisumbing alang sa maong tinguha.

Gipasabot ni Bercede nga ang ilang resolusyon nga gituohan niyang aprubahan sa tanang sakop sa konseho maoy pagsanong usab sa gihingusgang tinguha ni Mayor Jonas Cortes nga ma-lone district na ang Mandaue.

Si Quisumbing dihang nahinabi sa Banat News miangkon nga lisod na karon nga mahimong lone congressional district ang dakbayan sa Mandaue tungod kay ang Cordova ug Consolacion nga maoy mahibilin ilawom sa 6th District dili na mo-qualify sa rekisitos.

Matud pa ni Quisumbing nga ang labing sayon nga kahatagan og katumanan mao ang pag-redistricting sa tibuok lalawigan sa Sugbu aron dugangan pa og tulo ka mga distrito.

Ang lalawigan sa Sugbu adunay pito ka distrito lakip niini ang Lone District sa Lapulapu, samtang ang Cebu City adunay duha ka distrito ug gihugon-hugonang dugangan og usa pa ka distrito.

Nunot niining maong kahimtang si Cortes nagtinguha karon sa pagdangop sa mga kongresista sa tanang distrito sa Sugbo ug sa mga mayor sa kalungsoran alang sa pagtuki sa re-districting sa lalawigan. (Romeo Limpangog/EIM) (BANAT)