CEBU, Philippines - Naalarma karon ang kapolisan sa dakbayan sa Talisay kay ang mga traffic signage niini gipangawat, samtang ang uban dili na mabasa gumikan sa kakaraan na, matud ni Tronan Lastimosa, Vice Chairman sa City of Talisay Traffic Operation and Development Authority (CT-TODA).
Si Lastimosa nga nahinabi sa Banat News nagkanayon nga gitun-an karon sa ilang buhatan ang pagpahapsay sa dagan sa trapiko sa kadalanan sa Talisay.
Matud niya nga unahon nila ang pag-ilis sa mga signage sa kadalanan aron may mabasa ang mga motorista o pedestrian kung asa sila dapita pweding mosubay ug pweding mohunong.
Sa gipahigayong pakisusi sa buhatan sa CT-TODA nasuta nga ang ubang mga signage gipangkawat na ug ang uban dili na mabasa ang nakasuwat niini.
Gawas niini kuwang usab sila sa mga ekipo nga ilang magamit sa pagtaod sa mga signage hinuon ang buhatan sa CT-TODA nagpadala na og request ngadto sa kagamhanan sa siyudad sa ilang mga yangungo sa tanan nilang gikinahanglan aron sila makasugod na sa pag-implementar sa proyekto.
Ang CT-TODA mihangyo usab sa siyudad nga makabaton og tow-truck nga maoy moguroy sa mga sakyanan nga magpataka og parking ug sa biyaan sa drayber tungod kay dili gustong dakpon.
Gibutyag ni Lastimosa nga adunay mga higayon nga ang drayber sa traysikol kinsa nakalapas sa trapiko misutoy og dagan ug gidala ang yawe sa iyang unit tungod kay dili gustong dakpon sa enforcer.
Tungod kay mahadlok man mobalik ang drayber kung naa pa ang enforcer ang unit niining gibiyaan makahatag og huot sa trapiko.
Kun adunay towing truck , maguyod dayon ang sakyanang biyaan sa tag-iya sa daplin sa karsada.
Gawas niini matud ni Lastimosa nga nangita na usab sila og luna alang sa impounding area tungod kay kung maguroy nila ang unit aduna na kini obligasyon ang siyudad sa pagbantay niini nga dili mawagtangan og mga piyesa.
Ang mga traysikol ug traysikad gihinay-hinayan na nila og badlong ilabi na ang anaa sa daplin sa dalan sa Sangi sa barangay Tabunok kay nakahatag kini og kahuot sa trapiko.
Ang maong karsada gihimong sama na sa terminal sa mga traysikad ug traysikol ug gumikan sa maong sitwasyon ang mga traysikol nga kusog molabyog gibadlong na usab sa kapolisan kay makabalda kini sa dagan sa trapiko sa maong lugar. (Brenda D. Batuto/WC) (BANAT)