Talisay kuwang sa kahimanan pang-emerhensya

CEBU, Philippines - Ang dakbayan sa Talisay kuwang sa kahimanan sa pagtubag sa emerhensiya sama sa flash flood ug uban pang katalagman nga mugna sa kinaiyahan.

Apan bisan pa niini nagbansay sila og duha ka taknang flash flood drill sa barangay Lawaan III nga maoy pilot area niini gikan sa alas 8:00 sa buntag hangtod sa alas 10 sa buntag sa  miaging adlaw.

Ang maong lugar daplin sa sapa ug matud ni FO2 Guiller Pegaredo mikabat sa 450 ka mga pamilya ang nagpuyo niini.

Sa gihimo nilang flash flood drill, giorganisa nila ang Disaster Risk Reduction Management Council (DRRMC) nga gilangkuban sa kapolisan, City Social Welfare, City health, Talisay City Reaction Action Team (TREAT) ug sa Bureau of Fire Protection.

Si Talisay City Fire Marshal Felipe Canillas nga nahinabi sa Banat News mibutyag nga kuwang pa gyud sila sa mga ekipo sa pagtubag sa emerhensiya, apan   naglaom sila nga makapamalit pa og dugang kahimanan alang sa maong katuyoan ang siyudad.

Ang Talisay may usa lamang ka ambulansya nga dili gyud makasarang kung daghan ang mga tawong hakutonon sa panahon sa katalagman.

Si Canillas midugang nga matag usa sa 22 ka barangay sa dakbayan ilang bansayon sa mga paagi pagsalbar sa kinabuhi sa panahon sa emerhensya.

Lakip nga misalmot sa labing unang flash flood drill mao ang   Department of Education sa Talisay, City of Talisay Traffic Operation and Development Authority (CT-TODA)

Ang kapitan Deliah Ybañez sa Lawaan II nagkanayon nga sukad niadtong tuig 1995 lima ka flash flood na ang nasinatian sa ilang barangay nga namatyan gyud og tawo. (BANAT NEWS)