CEBU, Philippines - Mokabat sa 22 ka mga balay ang gitakdang gub-on sa Barangay Tisa diin lima niini hingpit nang nahawan.
Pipila sa apektadong molupyo nanghilak sa kaguol kay kasagaran kanila milanat na og 30 anyos nga nagpuyo sa maong lugar. Pipila sa mga nagpuyo mga negosyante og pagkaon busa gikasakit kaayo nila ang maong hitabo.
Suma pa ni barangay konsehal Eddie Cabulao nga ang maong luna gipanag-iya sa mga banay nga Jurado ug giingong sa miaging tuig pa unta kini kuhaon og balik sa tag-iya.
Gipahibalo hinuon ni Cabulao nga bukas ang ikatulong andana sa barangay hall aron himoong temporaryo nga pinuy-anan sa mga maapektohan sa demolisyon.
“Dunay uban nga miistar na lang sa ilang mga kaparyentihan, basta ang among barangay hall ug sports complex bukas alang kanila,” suma pa ni Cabulao.
Nagmalaumon hinuon si Cabulao nga mahilot ang maong suliran ug kahatagan og extension ang mga apektadong pamilya. (BANAT NEWS)