CEBU, Philippines - Gikatakdang pasakaan og kasong illegal nga paghupot og armas ang usa ka tawo nga nakapusil sa tigpatoktok sa manok nga igtatari sa barangay Dapdap, lungsod sa Liloan sa miaging gabii.
Ang suspetsado mao si Romnick Jugalbot Auman, 22, ulitawo, taga Dapdap, samtang ang biktima nailhan nga si Noel Ceniza, hingkod nga silingan sa suspetsado.
Si SPO1 Ricardo Enriquez sa kapolisan sa maong lungsod nga nahinabi sa Banat News nagkanayon nga maayong pagkapungag sa ilong ni Ceniza nga napunggit dihang nasabak sa bala sa armas de fuego sa suspetsado.
Matud pa ni SPO1 Eriquez nga nahigmata ang suspetsado gumikan sa kasaba sa pinugtak sa mga manok sa gawas sa balay.
Dugang pa ni SPO1 Enriquez nga maoy nakita sa suspetsado ang usa ka tawo nga nangabli sa pultahan sa tangkal sa mga manok nga igtatari ug sa iyang pagtuo nga kawatan kini, iya dayong giluthang.
Ang ulo gyud unta maoy puntariya sa bala sa armas sa suspetsado apan nakalingi kaniya ang biktima hinungdan nga ilong ray napisok niini.
Gihatod dayon ngadto sa Vicente Sotto Memorial Medical Center sa dakbayan sa Sugbo ang biktima, samtang ang suspetsado nadakpan usab dayon sa kapolisan ug nasakmit usab ang paltik nga .38 kalibre niini nga gigamit sa pagpangluthang uban sa upat ka mga buhing bala niini.
Sa pagkakaron nagpahayahay na sa prisohan ang suspetsado samtang gisang-at na ang tukmang kaso batok kaniya. - BANAT NEWS