CEBU, Philippines - Nagkaguliyang ang mga tinun-an ug mga magtutudlo sa usa ka tunghaan sa bukirang bahin sa barangay Usmad sa lungsod sa Argao human gidunggab ang usa ka 14-anyos nga tinun-an sa grade-6 sulod sa ilang classroom atol sa klase sa laing tinun-an kagahapon sa alas 9:20 sa buntag.
Ang biktima nga molupyo sa nahisgutang lugar ug tinun-an sa Usmad Elementary School nakaangkon og samad dinunggaban sa bukobubko.
Samtang nagtingkagol sa prisuhan ang suspek nga si Oliver Pamiron, 22, nga tinun-an usab sa 3rd year sa tupad ra usab nga tunghaan sa high school sa maong lugar.
Matud ni SPO1 Arnold Abenir, imbestigador sa Argao Police Station dihang nahinabi sa Banat News nahitabo ang pagpanunggab samtang nag-check sa Regional Achievement Test paper ang mga tinun-an sa grade-6 nga gidumala sa magtutudlo nga si Merlina Amarillo Albaracin.
Gikatahong miabot ang suspek nga gihulagway nga hubog ug dihang gipangutana ni Albaracin igo lang kini mitubag nga gusto siyang mangayo og pasaylo sa biktima nga iyang gikaaway sa pagkagabii.
Apan dihang nakit-an niini nga mibarog ang biktima sulod sa classroom kalit nga misulod ang suspek ug gidunggab ang biktima sa bukobuko.
Tungod niini daling giulang ni Albaracin ang duha ug gibunlot ang biktima nga nagkadugo na ang bukobuko tungod sa samad dinunggaban, ang suspek daling midagan palayo nga nagbitbit pa sa nagkadugo nga kutsilyo.
Usa ka maestro nga nakadungog sa komosyon daling migukod ug midangop sa balay sa kanhi konsehal sa barangay ug PTA president nga si Leornardo Amarillo, uban ang mga tanod ug ilang nadakpan ang suspek ug gipasa ngadto sa kapolisan.
Matud pa ni PO2 Bernie Lao nga nahinabi sa Banat News nga nianang pagkagabii ang biktima ug ang suspetsado nagkabingkil human wala pahulma sa biktima og flashlight ang suspek aron unta manguha og baki nga ilang ipulutan.
Gikataho usab nga nakuyapan ang magtutudlo sulod sa classroom human niini masaksihi ang nahitabo sa iyang tinun-an kinsa gidali pagdala sa Isidro Kintanar Memorial Hospital. -Darrel Carumba ug Lesley Caminade-Vestil/EIM (BANAT NEWS)